Kaja Kallas, Përfaqësuesja e Lartë e Bashkimit Evropian për Politikë të Jashtme dhe Siguri, ka emëruar diplomatin danez, Peter Sorensen, si pasardhës të Miroslav Lajçakut në postin e Dërguarit të Posaçëm të BE-së për dialogun mes Kosovës dhe Serbisë. Lajçaku ka mbajtur këtë post për gati pesë vjet, ndërsa mandati i tij skadon më 31 janar.
Emri i Sorensenit është dërguar për miratim te vendet anëtare të Bashkimit Evropian, dhe pritet që kandidatura e tij të shqyrtohet në takimin e Komitetit të Politikës dhe Sigurisë së BE-së (PSC), ku përfaqësuesit e të gjitha shteteve anëtare do të diskutojnë emërimin. Burime diplomatike brenda BE-së kanë deklaruar për Radio Evropa e Lirë se, sipas procedurës, konfirmimi i emrit të Sorensenit është një hap formal, pasi Kallas ka marrë tashmë vendimin për ta emëruar atë.
Sorensen, i cili është aktualisht Këshilltar i Lartë në Shërbimin e Veprimit të Jashtëm të BE-së (EEAS) për diplomaci digjitale, ka një karrierë të gjatë diplomatike dhe ka shërbyer në disa pozita kyçe në Ballkanin Perëndimor. Ai ka qenë përfaqësues i Posaçëm i BE-së për Bosnje e Hercegovinën, Shef i Zyrës së BE-së në Sarajevë dhe Shef i Delegacionit të BE-së në Shkup. Gjithashtu, ka punuar si këshilltar në Kosovë në misionin e Kombeve të Bashkuara (UNMIK) dhe ka pasur përvojë si përfaqësues i BE-së në Serbi, si dhe në misionin e OSBE-së në Kroaci.
Përvoja e tij e gjerë në rajon, si dhe njohuritë mbi dinamikat politike të Ballkanit, janë disa nga faktorët që kanë kontribuar në vendimin e Kajas Kallas për ta zgjedhur Sorensenin për këtë detyrë. Ai do të merret vetëm me dialogun Kosovë-Serbi dhe nuk do të ketë detyra të tjera në Ballkanin Perëndimor, ndryshe nga paraardhësi i tij, Miroslav Lajçak, i cili ka pasur një mandat më të gjerë.
Dialogu për normalizimin e marrëdhënieve mes Kosovës dhe Serbisë ka nisur në vitin 2011, ndërsa gjatë këtij periudhe janë arritur disa marrëveshje, të cilat shpesh kanë hasur vështirësi në zbatimin e tyre. Marrëveshja e fundit, e cila është ende e pa nënshkruar, është ligjërisht e obligueshme për të dyja palët dhe ka pasur një ndikim të madh në rrugëtimin e Kosovës dhe Serbisë drejt integrimit evropian.
Pritet që Peter Sorensen të konfirmohet në këtë post deri në fund të këtij muaji dhe të fillojë mandatin e tij nga muaji shkurt, duke pasuar kështu Lajçakun në udhëheqjen e dialogut mes dy shteteve.
