Presidentja e Kosovës, Vjosa Osmani, dhe Kryeministri Albin Kurti, zhvilluan të premten takime të ndara me Peter Sorensen, të Dërguarin e ri të Bashkimit Evropian për dialogun Kosovë-Serbi, gjatë Konferencës së Sigurisë në Munih. Tema kryesore e diskutimeve ishte e ardhmja e dialogut ndërmjet Kosovës dhe Serbisë, me fokus në pritshmëritë për vazhdimin e procesit të normalizimit të marrëdhënieve.
Osmani theksoi angazhimin e Kosovës për të punuar me aleatët ndërkombëtarë, duke siguruar që dialogu të përmbyllet me njohje të ndërsjellë dhe mbrojtje të sovranitetit, kushtetutshmërisë dhe integritetit territorial të Kosovës. Përmes një postimi në X, ajo theksoi se ky proces është kyç për stabilitetin dhe zhvillimin rajonal.
Ndërkohë, Kryeministri Kurti ka shpërndarë shqetësimet e tij lidhur me zbatimin e marrëveshjes për normalizimin e marrëdhënieve, arritur në vitin 2023, e cila ende nuk është nënshkruar nga palët dhe nuk është implementuar. Ai theksoi se marrëveshja është shkelur nga Serbia dhe kërkoi nënshkrimin e saj, si dhe tërheqjen e letrës së ish-kryeministres serbe, Ana Bërnabiq. Po ashtu, Kurti kërkoi dorëzimin e Millan Radoiçiq, për të cilin është ngritur aktakuzë nga Prokuroria e Kosovës.
Peter Sorensen, diplomati danez që mori detyrën më 1 shkurt, ka pasuar Miroslav Lajçakun në këtë rol dhe do të fokusohet vetëm në dialogun ndërmjet Kosovës dhe Serbisë. Ai është i njohur për angazhimet e tij të mëparshme në rajon, përfshirë punën në Kosovë, Serbi dhe Bosnje-Hercegovinë, dhe është parë si një emërim pozitiv për të përmirësuar procesin e dialogut.
Shefja e diplomacisë së BE-së, Kaja Kallas, ka shprehur mbështetje për një rishikim të formatit të dialogut, duke paralajmëruar se do të bashkëpunojë ngushtë me Sorensenin për të bërë dialogun më funksional. Sorensen ka pasur biseda në Paris dhe Berlin për avancimin e procesit dhe ka shprehur mirënjohjen për mbështetjen ndërkombëtare të përpjekjeve të tij.
Për momentin, nuk ka një datë të caktuar për takimin e parë të Sorensenit në kuadër të dialogut, pasi Kosova është në procesin e formimit të një qeverie të re pas zgjedhjeve të 9 shkurtit, ndërsa Serbia është përballur me pasiguri politike pas dorëheqjes së kryeministrit.
Dialogu ndërmjet Kosovës dhe Serbisë është i ndërmjetësuar nga Bashkimi Evropian që nga viti 2011, dhe të dyja palët presin një angazhim të ri dhe të fuqishëm nga Sorensen për të arritur marrëveshje për normalizimin e marrëdhënieve.
