Sekretari amerikan i Mbrojtjes, Pete Hegseth, theksoi të premten në Varshavë se prania ushtarake amerikane në Evropë nuk mund të jetë një angazhim afatgjatë. Ai u bëri thirrje vendeve evropiane të investojnë tani në mbrojtjen e tyre, pasi nuk mund të pritet që angazhimi amerikan në kontinent të vazhdojë pafundësisht.
Duke e vlerësuar Poloninë si një model, Hegseth përmendi planin e këtij shteti për të shpenzuar 4.7 për qind të PBB-së për mbrojtje këtë vit, dhe përsëriti kërkesën e Uashingtonit për një angazhim më të madh financiar nga aleatët evropianë të NATO-s. “Çfarë do të ndodhë në pesë, 10 ose 15 vjet është pjesë e një diskutimi më të gjerë që përfshin nivelin e kërcënimit, pozicionin e Amerikës, dhe nevojat tona globale, por më e rëndësishmja, aftësinë e vendeve evropiane për të rritur shpenzimet,” tha Hegseth gjatë një konference për media.
Ai shtoi se mesazhi i SHBA-së për aleatët evropianë është i qartë dhe i fortë: “Tani është koha për të investuar sepse nuk mund të supozoni se prania amerikane do të zgjasë përgjithmonë.”
Këto deklarata erdhën pas një takimi të ministrave të mbrojtjes të NATO-s në Bruksel, ku Hegseth paralajmëroi Evropën të mos e trajtojë Uashingtonin si një “budalla” përgjegjës për sigurinë evropiane. Ai gjithashtu theksoi se SHBA-ja përballet me kërcënime të shumta, përfshirë ato nga Kina.
Në një tjetër deklaratë të tij, Hegseth komentoi mbi situatën në Ukrainë, duke thënë se kthimi i vendit në kufijtë e vitit 2014 nuk është një qëllim realist dhe se administrata Trump nuk e sheh anëtarësimin e Ukrainës në NATO si pjesë të zgjidhjes së konfliktit me Rusinë. Ky koment shkaktoi reagime të shumta në Evropë, ku kritikët e konsideruan si një dorëzim të SHBA-ve përpara Rusisë edhe para fillimit të negociatave të paqes, duke e parë këtë si një fitore për presidentin rus Vladimir Putin.
Në mbrojtje të qëndrimeve të tij, Hegseth theksoi se ai e pranon realitetin në terren dhe la të hapur mundësinë për veprime të ardhshme të SHBA-së, përfshirë lëvizje në negociatat që mund të interpretohen si lëshime, siç janë ndihma ushtarake për Ukrainën dhe prania ushtarake amerikane në Evropë.
