Kryetari i Partisë Demokratike të Kosovës (PDK), Memli Krasniqi, ka reaguar me një postim të fortë në rrjetet sociale pas ngjarjeve tragjike që ndodhën në Kosovë, ku katër persona u vranë nga armët e zjarrit brenda vetëm tre ditësh. Krasniqi ka theksuar se pas këtyre vrasjeve që tronditën vendin, nuk mund të normalizohet gjendja e pasigurisë që ka kapluar shoqërinë kosovare.
Në reagimin e tij të plotë, Krasniqi theksoi se këto janë më shumë se thjesht statistika – janë jetë të humbura dhe familje të shkatërruara, duke u bërë apel institucioneve shtetërore që të veprojnë me urgjencë për të luftuar këtë fenomen të dhunshëm. Ai shtoi se asnjë qytetar nuk duhet të jetojë në frikë, dhe se është koha që shteti të zgjohet dhe të marrë masa për të garantuar sigurinë e qytetarëve.
“Sa jetë të tjera duhet të humbasim që të pranojmë se kjo është një emergjencë kombëtare? Sa familje të tjera duhet të shkatërrohen që të kuptojmë se qasja e lehtë në armë dhe dështimi i shtetit për të vepruar me vendosmëri janë një kombinim vdekjeprurës?” tha Krasniqi në postimin e tij.
Krasniqi gjithashtu premtoi që, pas konsolidimit të institucioneve dhe qeverisë së re, PDK do të iniciojë ndryshimin e Kodit Penal për të ashpërsuar dënimet për armëmbajtjen pa leje, duke kërkuar që kushdo që posedon apo përdor armë ilegalisht të përballet me burg, pa përjashtim.
Në fund të reagimit të tij, ai u shprehu ngushëllime të thella familjeve të viktimave, duke theksuar se është koha të zgjedhim jetën dhe të veprojmë pa mëdyshje për të garantuar sigurinë e qytetarëve të Kosovës.
