Presidenti i Shteteve të Bashkuara, Donald Trump, njoftoi të mërkurën se SHBA-ja do të vendosë një tarifë prej 10% për importet nga të gjitha vendet, përfshirë Kosovën dhe shtetet e tjera të Ballkanit Perëndimor. Ky vendim i Trump ka për qëllim të ndalë deficitin tregtar të SHBA-së dhe të stimulojë prodhimin brenda vendit. Ai gjithashtu ka njoftuar tarifa më të larta për disa shtete që kanë suficit tregtar me SHBA-në, siç janë Kina dhe vendet e Bashkimit Evropian.
Tarifat për vendet e Ballkanit Perëndimor janë të ndryshme: 10% për importet nga Kosova dhe Shqipëria, ndërsa Serbia do të përballet me një tarifë prej 37%, Bosnja e Hercegovina 35%, dhe Maqedonia e Veriut 33%.
Në fjalimin e tij nga Shtëpia e Bardhë, Trump pohoi se tarifa ndaj mallrave të importuara nga Kina do të jetë 34%, nga Bashkimi Evropian 20%, ndërsa për Koreja e Jugut dhe Japoninë, tarifa do të jetë përkatësisht 25% dhe 24%.
Për Kosovën, produktet që eksportohen në SHBA përfshijnë ushqime, lëngje, tekstil, dyshekë, si dhe produkte nga druri dhe plastika. Sipas të dhënave të Doganës së Kosovës, vlera e eksporteve të Kosovës në SHBA ka njohur një rritje të madhe, duke arritur nga 3 milionë euro në vitin 2019 në mbi 131 milionë euro në vitin 2022.
Trump shpalli një emergjencë ekonomike kombëtare për të zbatuar këto tarifa, të cilat priten të prodhojnë të ardhura vjetore në qindra miliarda dollarë. Ai ka premtuar se këto tarifa do të sjellin rikthimin e vendeve të punës në SHBA, por disa analistë paralajmërojnë për mundësinë e një ngadalësimi të papritur ekonomik për shkak të rritjes së çmimeve për mallra të ndryshme si automjete, veshje, dhe produkte të tjera të konsumit.
Trump ka theksuar se SHBA do të ndalë “grabitjen” që, sipas tij, ka ndodhur për më shumë se 50 vjet, duke kërkuar që kjo politikë të sjellë përfitime për ekonominë amerikane dhe qytetarët e saj.
