Një operacion i Policisë në Graçanicë ka rezultuar me zbulimin e një arsenali armësh në shtëpinë e një të dyshuari, pas një informacioni të siguruar nga një dëshmitare në një rast të dhunës në familje.
Burime të Gazetës Sinjali brenda hetuesisë bëjnë të ditur se bastisja është realizuar mbrëmë, më 17 prill, rreth orës 22:30, në fshatin Dobrotin.
Sinjali mëson ekskluzivisht se i dyshuari është Goran Pereniq, rreth 39-vjeçar i cili është kapur me disa armë dhe pajisje ushtarake për të cilat nuk posedonte asnjë leje.
Gjatë kontrollit në shtëpinë e tij, të kryer nga njësitë patrulluese dhe hetimore të Stacionit Policor në Graçanicë, janë sekuestruar: Një pushkë gjahu, një karabinë gjahu, një dylbi optik për armë, rreth 50 fishekë, si dhe 3 radio-lidhje.
I dyshuari nuk ka rezistuar, por ka pranuar posedimin e armëve. Rasti është proceduar te prokurori kujdestar, i cili ka udhëruar inicimin e hetimeve për veprën penale “Përvetësim, kontroll ose posedim i paautorizuar i armëve”.
Ndaj Pereniq është caktuar masa e ndalimit për 48 orë dhe ai është dërguar në Qendrën e mbajtjes në Graçanicë.
