Më 4 janar 1999, në një periudhë kur Kosova po përjetonte tmerrin e okupimit dhe terrorit, një zë i guximshëm e sfidoi errësirën e heshtjes. Radio-Kosova e Lirë bëri debutimin e saj, duke shënuar fillimin e një lufte të re për lirinë dhe dinjitetin e popullit shqiptar. Ishte një zë që jo vetëm thyeu izolimin informativ, por i dha frymë rinisë së Ushtrisë Çlirimtare të Kosovës dhe të gjithë atyre që besonin në një të ardhme më të ndritur.
Në ato ditë të errëta, kur dhuna dhe represioni ishin të pranishëm në çdo cep të Kosovës, Radio-Kosova e Lirë ishte më shumë se një thjeshtë një mjet komunikimi. Ajo u shndërrua në një simbol të rezistencës dhe forcës, duke bërë të mundur që zëri i luftëtarëve për liri të mbërrinte në çdo shtëpi dhe çdo zemër shqiptari. Programet e saj nuk transmetonin vetëm lajme të freskëta dhe mesazhe mobilizuese, por edhe këngë, poezi dhe thirrje për solidaritet, që ngjallnin shpresë dhe forcë për të vazhduar luftën.
Përmes kësaj platforme, çdo shqiptar mund të ndiente zemrën e luftës dhe të shihte se liria ishte më afër se kurrë. Kur pushtuesi po përpiqej të mbillte frikë dhe dëshpërim, ky zë i fortë dhe i pandalur bëri që shpresa të mos shuhej kurrë.
Sot, 26 vjet pas asaj dite historike, Radio-Kosova e Lirë mbetet një kujtesë e gjallë e guximit dhe sakrificës që përcaktoi fatin e një kombi. Ky zë i pavdekshëm na kujton jo vetëm vuajtjet dhe sfidat e atyre ditëve, por gjithashtu forcën e jashtëzakonshme të një populli që nuk u dorëzua kurrë.
Në këtë përvjetor të rëndësishëm, kujtojmë të gjithë ata që morën pjesë në këtë luftë për liri, ata që i dhanë zë së vërtetës dhe i dhanë Kosovës një vend të merituar në historinë e lavdishme të popullit shqiptar. Radio-Kosova e Lirë mbetet një thirrje e përhershme për ruajtjen e lirisë, një trashëgimi e pavdekshme që na kujton sakrificën e atyre që dhanë gjithçka për një Kosovë të lirë.
Lavdi dëshmorëve dhe nderim për të gjithë ata që mbajtën gjallë ëndrrën për liri!
