Cristiano Ronaldo vazhdon të shkëlqejë me fanellën e Al Nassr, duke regjistruar një tjetër performancë të jashtëzakonshme. Ylli portugez ka arritur kuotën e 931 golave në karrierë, pasi realizoi dy gola në fitoren 3-1 të skuadrës së tij ndaj Al Hilal, në kuadër të javës së 26-të të Ligës Saudite Pro.
Ronaldo hapi serinë e golave në minutën e 47-të, me prekjen e tij të parë pas një asistimi të saktë nga Sadio Mane. Ai vulosi fitoren e Al Nassr në minutën e 88-të, duke shënuar golin e tij të dytë personal dhe të tretin për skuadrën.
Me këto dy gola, pesë herë fituesi i Topit të Artë numëron tani 795 gola në nivel klubesh dhe 136 me përfaqësuesen portugeze, duke e çuar totalin në 931.
Pavarësisht fitores, Al Nassr mbetet në vendin e tretë të renditjes me 54 pikë, shtatë më pak se lideri Al Ittihad, ku aktivizohet edhe futbollisti shqiptar Mario Mitaj. Skuadra e Ronaldos shpreson ende në një mrekulli për të kapur kreun dhe për të siguruar titullin kampion.
