Sipas ekspertëve të feng shui-t, ekziston një bimë që nuk sjell vetëm bukuri dhe gjelbërim në ambientet e brendshme, por edhe energji pozitive, mirëqenie, lumturi dhe pasuri. Bëhet fjalë për Crassula Ovata, e njohur ndryshe si “pema e parave”.
Një kujdestare e energjisë pozitive
Feng shui, arti i lashtë kinez për organizimin e hapësirës në funksion të harmonisë dhe energjisë jetike (chi), e konsideron këtë bimë si një përforcues të fuqishëm të energjisë pozitive. Ajo ndihmon në përmirësimin e atmosferës në dhomë, pastron ajrin dhe ndikon pozitivisht në humor.
Ekspertët e feng shui-t besojnë se vendosja e pemës së parave në vendin e duhur – konkretisht në anën e djathtë të hyrjes së shtëpisë apo zyrës – ndihmon në tërheqjen e stabilitetit financiar dhe suksesit material.
Crassula Ovata – Pema me “gjethe monedhe”
Kjo bimë vjen nga Afrika e Jugut dhe i përket grupit të sukulentëve – bimë që ruajnë ujin në gjethe. Ajo dallohet për gjethet e saj jeshile, me shkëlqim, të cilat kanë formën e monedhave, çka sipas besimit popullor simbolizon pasurinë dhe bollëkun.
Crassula Ovata është një bimë e lehtë për t’u rritur dhe është ideale për ata që nuk kanë shumë përvojë në kopshtari. Me kujdesin e duhur, mund të arrijë deri në tre metra lartësi dhe lulëzon në dimër me lule të vogla të bardha.
Këshilla për kujdesin dhe shumimin
Për një rritje të suksesshme, bima ka nevojë për tokë të kulluar mirë, të ngjashme me atë të kaktusëve – një përzierje me rreth 40% rërë, 20% humus pylli dhe pjesa tjetër tokë vazo dhe zhavorr të imët ose perliti.
Në dimër (tetor – prill), bima hyn në një periudhë pushimi dhe duhet ujitur shumë rrallë – vetëm një ose dy herë në muaj. Temperatura ideale gjatë kësaj kohe është rreth 10°C, por duhet të ruhet nga ngricat. Nëse mbahet në një dhomë të ngrohtë, ujitja mund të bëhet pak më shpesh, por gjithmonë në mënyrë të moderuar.
Crassula është gjithashtu e njohur për shumimin e lehtë. Mënyra më e zakonshme është përmes degëve: priten degë të gjata 5-15 cm, lihen të thahen për 2-3 ditë dhe më pas mbillen në një përzierje dheu dhe rëre. Një metodë tjetër është përmes gjetheve, të cilat, kur vendosen në tokë, mund të zhvillojnë rrënjë dhe të kthehen në bimë të reja.
Një simbol i pasurisë dhe forcës së brendshme
Pema e parave nuk është vetëm një zbukurim estetik, por mbart një simbolikë të fortë – ajo përfaqëson bollëk, këmbëngulje dhe prosperitet. Në feng shui, besohet se kjo bimë ndihmon në krijimin e kushteve për rritje personale dhe financiare.
Nëse jeni në kërkim të një elementi që do t’i japë energji pozitive shtëpisë ose vendit tuaj të punës, Crassula Ovata mund të jetë zgjedhja ideale – jo vetëm për bukurinë e saj, por edhe për vlerat që simbolizon.
