Gjykata Speciale në Hagë ka ngritur akuza të reja ndaj ish-presidentit të Kosovës, Hashim Thaçi, duke e akuzuar për vepra penale të pengimit të drejtësisë. Sipas një njoftimi zyrtar të Zyrës së Prokurorit të Specializuar (ZPS), Thaçi akuzohet për tre raste të pengimit të personave zyrtarë në kryerjen e detyrave të tyre, tre raste të shkeljes së fshehtësisë së procedurës dhe katër raste të mosbindjes ndaj gjykatës.
Në kohën kur akuzat iu komunikuan, Thaçi ndodhej në Objektin e Paraburgimit të Dhomave të Specializuara të Kosovës në Hagë. Për veprat e reja penale, ai do të dalë para një gjykatësi të procedurës paraprake.
Arrestime të tjera dhe thirrje për paraqitje
Në kuadër të hetimeve për pengim të drejtësisë, ZPS ka arrestuar në Kosovë Bashkim Smakajn, Isni Kilajn dhe Fadil Fazliun. Arrestimet u kryen bazuar në fletë-arrestimet dhe urdhrat e transferimit të lëshuara nga Gjykata Speciale. Të tre të arrestuarit akuzohen për tentativë për pengim të personave zyrtarë dhe mosbindje ndaj gjykatës. Ata tashmë janë transferuar në Hagë dhe pritet të dalin para gjykatës brenda një kohe të arsyeshme.
Ndërkohë, ish-ministrit të Drejtësisë, Hajredin Kuçit, i është dorëzuar një fletë-thirrje për paraqitje për dy akuza të mosbindjes ndaj gjykatës. Kuçi do të duhet të paraqitet para Dhomave të Specializuara për t’u përballur me këto akuza.
Mbështetje ndërkombëtare për operacionet
Në zbatimin e këtyre masave, Zyra e Prokurorit të Specializuar ka marrë mbështetje operacionale dhe logjistike nga Misioni i Bashkimit Evropian për Sundimin e Ligjit në Kosovë (EULEX), si dhe mbështetje operacionale nga Policia e Kosovës.
Në njoftimin zyrtar, ZPS ka theksuar se e trajton pengimin e drejtësisë si një çështje jashtëzakonisht serioze dhe mbetet e angazhuar për të ndjekur penalisht çdo individ të përfshirë në veprime që pengojnë drejtësinë.
