Trajneri i Manchester City, Pep Guardiola, ka shprehur zhgënjimin e tij për largimin e paralajmëruar të Kevin De Bruyne nga klubi në fund të sezonit. Ai e cilësoi këtë një “ditë të trishtë”, duke theksuar se sukseset e “qytetarëve” nuk mund të imagjinohen pa kontribuimin e belgunit.
“Është një ditë e trishtë, por edhe një ditë e lumtur, sepse kemi pasur mundësinë të përjetojmë këtë rrugëtim me të, atë që na ka dhënë të gjithëve. Nuk është e nevojshme të flasim për sukseset e tij në vendin tonë gjatë dekadës së fundit, është e pamundur të imagjinohet pa të. Një ditë e trishtë sepse një pjesë e jonë po largohet”, u shpreh Guardiola.
Guardiola është trajner i Manchester City që nga viti 2016, ndërsa De Bruyne u bë anëtar i klubit në vitin 2015. Gjatë kohës së tyre së bashku, ata fituan Ligën e Kampionëve, gjashtë tituj Premier League, pesë Kupa të Ligës dhe dy Kupa FA.
“Kevin është një nga mesfushorët më të mëdhenj që ka luajtur ndonjëherë në këtë vend, dhe pa dyshim edhe në Manchester City. Nuk ka dyshim se ai është një nga më të mëdhenjtë për shkak të qëndrueshmërisë së tij në ndeshje të rëndësishme”, shtoi Guardiola.
