Kryetari i Bashkisë së Kievit, Vitali Klitschko, ka deklaruar për BBC se Ukraina mund të detyrohet të heqë dorë nga një pjesë e territorit të saj si pjesë e një marrëveshjeje të mundshme paqeje me Rusinë. Kjo deklaratë vjen në një kohë kur po rritet presioni ndërkombëtar, përfshirë nga ish-presidenti amerikan Donald Trump, për të pranuar lëshime territoriale.
“Një nga skenarët është… heqja dorë nga territori. Nuk është e drejtë. Por për paqen, ndoshta mund të jetë një zgjidhje e përkohshme,” tha Klitschko gjatë një interviste për programin “Today” në BBC Radio 4.
Megjithatë, ish-kampioni i botës në boks, tani politikan 53-vjeçar, theksoi se populli ukrainas “nuk do ta pranonte kurrë pushtimin” nga Rusia.
Deklarata e tij u bë pak orë pas një sulmi të ashpër me raketa dhe dronë nga Rusia në kryeqytetin ukrainas, i cili la të vdekur 12 persona dhe plagosi mbi 80 të tjerë.
Nga zyra e tij në qendër të Kievit, Klitschko e përshkroi qytetin si “zemra e vendit të shkatërruar nga lufta”, duke theksuar përgjegjësinë që mban për mbrojtjen e tij.
Ai gjithashtu sugjeroi se Presidenti Volodymyr Zelensky mund të detyrohet të bëjë një “zgjidhje të dhimbshme” për të arritur paqen, por sqaroi se nuk është përfshirë në asnjë diskutim zyrtar me të për këtë çështje: “Presidenti Zelensky e bën vetë. Nuk është funksioni im,” tha Klitschko.
Marrëdhëniet mes Klitschko dhe Zelensky janë të tensionuara, pasi kryebashkiaku i ka akuzuar shpesh presidentin dhe stafin e tij për përpjekje për të minuar autoritetin e tij.
