Kryeministri i Kosovës, Albin Kurti, vizitoi sot familjen e rreshterit të Policisë së Kosovës, Muhamed Lika, për të shprehur ngushëllime pas vrasjes së tij të martën, më 1 prill.
Në njoftimin e lëshuar nga Qeveria, thuhet se Kurti u mirëprit nga familjarët e të ndjerit dhe gjatë vizitës vlerësoi lartë figurën e rreshterit Lika për kontributin e tij në ruajtjen e rendit dhe ligjit, si dhe për sigurinë e qytetarëve dhe shtetit.
“Rreshteri Muhamed Lika ka punuar e kontribuar shumë për rendin dhe ligjin, paqen dhe sigurinë e qytetarëve dhe shtetit tonë. Përpara se gjithash, ai është angazhuar dhe ka kontribuar si luftëtar i UÇK-së për çlirimin e popullit dhe vendit tonë. Vrasja e tij do të zbardhet dhe kriminelët tinëzarë do të gjykohen e dënohen. Emri i tij do të rrojë dhe kujtimi për të nuk do të shlyhet,” ka shkruar Kurti në librin e ngushëllimeve.