Kryeministri i Kosovës, Albin Kurti, në një konferencë për media të mbajtur sot, ka adresuar problematikën e “Terrorizmit të Sponsorizuar nga Serbia dhe Përgjegjësinë për Sulmet në Kosovë.” Konferenca kishte si temë diskutimi sulmet e organizuara, të cilat janë pjesë e një strategjie të koordinuar nga Beogradi për të destabilizuar Kosovën dhe rrezikuar sigurinë e saj.
Kurti theksoi se sulmi i datës 29 nëntor 2024 ndaj Kanalit Ibër-Lepenc, që shkaktoi dëme të mëdha infrastrukturore, kishte për qëllim paralizimin e jetës ekonomike dhe energjetike të Kosovës, si dhe provokimin e trazirave që mund të rrezikonin sigurinë kombëtare dhe stabilitetin e rajonit.
Në konferencën e sotme, Kryeministri i Kosovës kritikoi Beogradin për refuzimin e dorëzimit të Millan Radoiçiqit, një prej individëve kryesorë përgjegjës për sulmin terrorist të 24 shtatorit 2023, që kishte për qëllim okupimin e veriut të Kosovës. Ai akuzoi Serbinë për strehimin e Radoiçiqit dhe përkrahjen që i ofron atij përmes infrastrukturës për trajnim të grupeve terroriste, duke i dhënë mbështetje të hapur në luftën hibride kundër Kosovës.
Sipas Kurtit, Serbia vazhdon të mbështesë grupe terroriste që po organizojnë sulme në veri të Kosovës. Ai po ashtu theksoi se situata është përshkallëzuar me shpërndarjen e postera që promovojnë liderin serb Aleksandar Vuçiq dhe kërkesa për “komandant suprem,” që është një mesazh i drejtpërdrejtë për mbështetje ndaj grupeve të lidhura me Radoiçiqin.
Gjatë kësaj periudhe, nga qershori deri në nëntor të vitit 2024, në veri të Kosovës janë realizuar mbi 15 sulme terroriste, përfshirë shpërthime, djegie automjetesh dhe hedhje granatash. Sipas informacioneve të sigurisë, dy persona të afërt të Radoiçiqit, Nemanja Radivojeviq dhe Vladimir Radivojeviq, janë përgjegjës për disa nga këto sulme.
Kurti ka bërë thirrje për një qëndrim më të fortë nga bashkësia ndërkombëtare, duke kërkuar dënimin e veprimeve terroriste të Serbisë dhe përgjegjësinë e plotë për destabilizimin e Kosovës. Ai ka theksuar se Republika e Kosovës ka forcuar sovranitetin dhe sigurinë në veri dhe do të vazhdojë të luftojë çdo formë të agresionit të organizuar nga jashtë.
Ky është një zhvillim i rëndësishëm në një kohë kur tensionet në veri të Kosovës janë përshkallëzuar, dhe politika e agresivitetit të Serbisë ndaj Kosovës ka krijuar një mjedis të rrezikshëm për paqen dhe sigurinë në rajon.
