Në një deklaratë të fundit, nënkryetari i Lidhjes Demokratike të Kosovës, Lutfi Haziri, thekson rëndësinë e Republikës si vlerë themelore për qytetarët dhe institucionet e vendit.
Sipas Hazirit, themeluesit e Republikës së Kosovës e kanë trajtuar me kujdes jo vetëm pavarësinë dhe sovranitetin, por edhe demokracinë, si element thelbësor të shtetndërtimit. Ai shton se nuk mjafton të jesh vetëm gardian i Republikës, nëse kjo vjen në dëm të demokracisë.
“Nga kjo legjislaturë kërkohet që të rikthehemi në rolin dhe vendimmarrjen e vështirë politike për të mirën e Republikës”, thekson Haziri.
Ai apelon për përgjegjësi dhe udhëheqje me guxim, në mënyrë që të mbrohen aspiratat e popullit të Kosovës, të cilat u kurorëzuan më 17 shkurt 2008 me shpalljen e pavarësisë.
“Republika mbi të gjithë ne!” – përfundon ai, duke përcjellë mesazhin e unitetit dhe përkushtimit ndaj vlerave kushtetuese.
