Elon Musk, njeriu më i pasur në botë dhe këshilltar i ish-presidentit Donald Trump, ka shpërndarë sërish shpërblime financiare për votuesit në SHBA, këtë herë me vlerë dy milionë dollarë, në këmbim të nënshkrimit të një peticioni përpara zgjedhjeve të Gjykatës së Lartë të Shteteve të Bashkuara. Kjo ka ndodhur në prag të zgjedhjeve të Gjykatës së Lartë në shtetin e Wisconsin, ku Musk ka organizuar një “llotari” për të mbështetur kandidatin konservator.
Musk ofroi dy çeqe, secili prej një milion dollarësh (rreth 924 mijë euro), si pjesë të fushatës së tij për të inkurajuar votuesit të nënshkruajnë një peticion që kërkon largimin e gjyqtarëve “aktivistë”. Ai theksoi se qëllimi i tij ishte që gjyqtarët të ishin “thjesht gjyqtarë”, duke sugjeruar se ai donte një sistem më të ekuilibruar në gjykatë.
Megjithatë, Prokurori i Përgjithshëm Federal, Josh Kaul, u përpoq të ndalonte këtë veprim të Musk, duke e quajtur një tentativë për të blerë vota dhe duke e konsideruar atë një shkelje të ligjit federal, i cili ndalon dhënien e dhuratave për të ndikuar në zgjedhje. Avokatët e Musk argumentuan se kjo ishte një shprehje politike dhe e mbështetur nga Amendamenti i Parë i Kushtetutës së SHBA, që mbron lirinë e fjalës. Ata shtuan se qëllimi i pagesave ishte inkurajimi i një lëvizjeje kundër gjyqtarëve “aktivistë”, dhe jo për të ndikuar direkt tek votuesit për të zgjedhur një kandidat të caktuar.
Një gjykatë e refuzoi kërkesën e Kaul për të ndaluar veprimet e Musk, pa dhënë asnjë arsyetim për vendimin. Ky rast ngjalli kujtime për një ngjarje të ngjashme vitin e kaluar, kur Musk ofroi shpërblime prej një milion dollarësh për banorët e Wisconsin dhe gjashtë shteteve të tjera në prag të zgjedhjeve presidenciale të nëntorit, për të nënshkruar një peticion në mbështetje të Amendamentit të Parë dhe të Dytë të Kushtetutës së SHBA. Një gjykatës i Pensilvanisë vendosi atëherë që “llotaria” ishte e ligjshme.
Zgjedhjet për Gjykatën e Lartë në Wisconsin kanë një rëndësi të madhe pasi mund të ndikojnë në drejtimin politik të gjykatës në të ardhmen, e cila aktualisht ka një balancë të ndarë mes katër gjyqtarëve liberalë dhe tre konservatorëve. Ky votim mund të ketë ndikim në ndarjen e vendeve republikane dhe demokrate në Kongres. Musk dhe Trump kanë mbështetur kandidatin konservator Brad Schiml, për të cilin Musk ka dhuruar miliona dollarë përpara zgjedhjeve.
Schimel, nga ana tjetër, është distancuar nga mbështetja e Musk, duke theksuar se ai nuk kishte njohuri të drejtpërdrejta për fushatën e Musk dhe nuk kishte në plan të merrte pjesë në ngjarjet e tij.
Këto zgjedhje janë shpallur si më të shtrenjtat në historinë e Gjykatës së Lartë të SHBA, me një shpenzim total prej 81 milionë dollarësh (rreth 75 milionë euro). Musk dhe grupet që ai mbështet kanë dhuruar më shumë se 20 milionë dollarë për të mbështetur Schiml. Po ashtu, analistët politikë e konsiderojnë këtë një lloj referendumi për mbështetjen e administratës Trump, vetëm pak muaj pas inaugurimit të tij si president.
