Monumenti simbol i pavarësisë së Kosovës, Newborn, ka marrë një pamje të re me rastin e 17-vjetorit të shpalljes së pavarësisë. Ideatori i këtij monumenti, Fisnik Ismaili, ka publikuar sot fotografi të dizajnit të ri të Newborn, duke e bërë atë sërish qendër të vëmendjes në festimet e 17 Shkurtit.
Kosova shënon sot 17 vite shtetësi, që nga shpallja e pavarësisë më 17 shkurt 2008. Në atë ditë historike, në një mbledhje të jashtëzakonshme të Kuvendit, ku morën pjesë 109 deputetë, u shpall Kosova si një shtet i pavarur, sovran dhe demokratik.
Flamuri shtetëror i Kosovës u shpalos për herë të parë në seancën solemne të shpalljes së pavarësisë. Megjithatë, pavarësia e Kosovës vazhdoi të ishte temë diskutimi në skenën ndërkombëtare, pasi Serbia e kundërshtoi atë duke e cilësuar të paligjshme. Në vitin 2008, Serbia kërkoi opinion këshillues nga Gjykata Ndërkombëtare e Drejtësisë, e cila më 22 korrik 2010 konfirmoi ligjshmërinë e shpalljes së pavarësisë së Kosovës.
Rrugëtimi drejt pavarësisë ishte i gjatë dhe i vështirë për popullin e Kosovës, i cili për dekada vuajti pasojat e spastrimit etnik nga regjimi i Sllobodan Millosheviçit. Lufta Çlirimtare e Kosovës (1997-1999) solli ndërhyrjen e forcave ndërkombëtare, të cilat u vendosën në Kosovë për të garantuar paqen dhe sigurinë pas përfundimit të konfliktit.
Ndërkohë, çështja e njohjes ndërkombëtare mbetet ende e hapur. Më 18 shkurt 2008, Bashkimi Evropian vendosi t’u lërë vendeve anëtare të drejtën për të vendosur nëse do ta njihnin apo jo pavarësinë e Kosovës. Shumica e shteteve të BE-së e kanë njohur Kosovën, por Qiproja, Greqia, Rumania, Sllovakia dhe Spanja ende nuk e kanë njohur atë.
Në kuadër të festimeve të 17-vjetorit, Prishtina mirëpret një sërë aktivitetesh dhe organizimesh, me monumentin Newborn si një nga pikat qendrore të këtij përvjetori historik.
