Presidentja e Republikës së Kosovës, Vjosa Osmani, ka pritur sot në takim Sekretarin e Jashtëm të Mbretërisë së Bashkuar, David Lammy. Gjatë takimit, Presidentja Osmani theksoi rëndësinë e një marrëveshjeje të avancuar strategjike me Mbretërinë e Bashkuar, e cila do të fokusohet në fushat e mbrojtjes dhe ekonomisë. Propozimi i Presidentes Osmani u mirëprit nga Sekretari Lammy.
Diskutimet përfshinë edhe mbështetje të palëkundur për sovranitetin dhe pavarësinë e Kosovës, sigurinë rajonale, dhe dialogun me Serbinë. Të dy liderët theksuan rëndësinë e forcimit të bashkëpunimit ekonomik dhe avancimit të procesit të integrimit euroatlantik të Kosovës.
Presidentja Osmani u shpreh e përkushtuar për konkretizimin e këtij partneriteti dhe për forcimin e mëtejshëm të aleancës me Mbretërinë e Bashkuar, duke u angazhuar për ruajtjen e demokracisë, sundimin e ligjit dhe mbrojtjen e paqes me mbështetjen e aleatëve strategjikë.