Kompania kroate e automjeteve sportive, Rimac Group, është e interesuar të blejë aksionet që Porsche zotëron në sipërmarrjen e përbashkët Bugatti Rimac, duke sinjalizuar një ndryshim të rëndësishëm në partneritetin mes dy prodhuesve.
Sipas burimeve të Bloomberg, Rimac ka paraqitur një ofertë paraprake për blerjen e 45% të aksioneve që aktualisht i përkasin Porsche, gjë që do ta vendoste prodhuesin kroat në pozitën e kontrolluesit të vetëm me 100% të aksioneve. Aktualisht, Rimac zotëron 55% të kompanisë së përbashkët. Megjithatë, bisedimet janë ende në një fazë të hershme dhe nuk është e sigurt nëse do të përmbyllen me marrëveshje.
Porsche, në një koment për Bloomberg, nuk e mohoi ofertën, por theksoi: “Porsche vlerëson vazhdimisht optimizimet e mundshme të portofolit të saj të aksioneve dhe bashkëpunon ngushtë me partnerët e biznesit dhe bashkë-investitorët”. Kompania shtoi gjithashtu se vazhdon të besojë fort në potencialin e markës Bugatti.
Një kthesë strategjike për Porsche
Vetëm pak muaj më parë, Porsche kishte në plan të rriste kontrollin mbi sipërmarrjen e përbashkët. Por, sipas burimeve, ndryshimet në menaxhment dhe sfidat në tregun global të makinave kanë bërë që strategjia të ndryshojë. Me rënien e shitjeve në Kinë, probleme të zinxhirit të furnizimit dhe ulje të kërkesës për makinat elektrike, Porsche ka rishikuar objektivat e saj. Ajo ka ulur pritshmëritë për EV-të dhe ka njoftuar një investim prej 800 milionë eurosh në zhvillimin e modeleve me karburant tradicional.
Probleme dhe tensione në bashkëpunim
Rimac dhe Porsche themeluan Bugatti Rimac në vitin 2021, me synimin për të zhvilluar dhe prodhuar hipermakina luksoze. Një nga sukseset më të mëdha ishte modeli Tourbillon, një hipermakinë hibride prej 3.8 milionë euro, që u shit e gjitha menjëherë (250 njësi). Por, pas këtij suksesi fillestar, tensionet nisën të shfaqen.
Në dhjetor të vitit të kaluar, u raportua se Porsche ishte e pakënaqur me ecurinë e bashkëpunimit, sidomos pas shitjeve zhgënjyese të modelit Rimac Nevera dhe rënies me 46% të të ardhurave, në 182 milionë euro. Në atë kohë, Porsche kërkonte të marrë drejtimin e kompanisë, duke e konsideruar menaxhimin nga Rimac si të dobët dhe jofunksional.
Sipas Bloomberg, problemet lindin edhe nga vetë diferencat mes dy kompanive: ndërsa Rimac shet vetëm rreth 100 makina në vit, Porsche shet mbi 310,000, dhe teknologjia që përdorin është e ndryshme. Ky kontrast e bën bashkëpunimin më sfidues.
Edhe pse Rimac nuk ka mundësi ta detyrojë Porsche të shesë aksionet, gjiganti gjerman ka avantazh në negociata, nëse vendos të shesë. Çmimi i kërkuar mund të jetë i lartë, por nëse Rimac arrin marrëveshjen, do të bëhej pronari i vetëm i një prej emrave më legjendarë në industrinë e makinave luksoze.
