I dërguari i Bashkimit Evropian për dialogun Kosovë-Serbi, Peter Sorensen, theksoi se në takimin e tij me kryeministrin Albin Kurti, është diskutuar për mënyrat e avancimit të procesit të dialogut. Ai e ka cilësuar këtë takim si një “fillim të mirë”. Pas takimit, Sorensen ka bërë një deklaratë të shkurtër për mediat, ku ka theksuar se procesi i dialogut ka sjellë shumë zhvillime që kërkojnë përpjekje për të punuar mbi to. “Kemi diskutuar mbi mënyrat se si procesi mund të vazhdojë dhe të përparojë, kështu që ky është një fillim i mirë. Qëllimi është, sigurisht, që procesi të vazhdojë dhe të përparojë,” ka deklaruar ai.
Ai shtoi se do të udhëtojë në Beograd dhe pas zhvillimit të bisedave të para me liderët atje, do të ulet për të vlerësuar gjendjen. Sorensen theksoi se vendosi të vizitojë Kosovën sa më shpejt të jetë e mundur. I pyetur për mbylljen e institucioneve paralele të Serbisë në Kosovë, ai theksoi se duhet punuar për të siguruar që qytetarët të marrin shërbimet në mënyrën më të mirë të mundshme, duke shtuar se kjo është diçka që do të përpiqen të realizojnë.
Diplomati danez shpjegoi se “u takon palëve ta përcaktojnë” nëse janë të nevojshme kompromise, por ai theksoi se “dialogu është për këtë dhe kjo është ajo që kemi bërë që nga viti 2011”.
