Pista legjendare e Spa-Francorchamps, e njohur për traditën dhe emocionet që sjell, do të vazhdojë të jetë pjesë e kampionatit botëror të Formula 1 deri në vitin 2031. Kjo është konfirmuar nga Liberty Media, grupi që zotëron të drejtat e kompeticionit.
Sipas planit të ri të kalendarit, Çmimi i Madh i Belgjikës do të zhvillohet në sezonet 2026, 2027, 2029 dhe 2031, ndërsa për sezonet 2028 dhe 2030, ende nuk është vendosur se cilat gara do të zëvendësojnë Belgjikën.
Kryetari i Liberty Media, John Malone, deklaroi se bisedimet me disa organizatorë të mundshëm janë në vazhdim.
“Dera është gjithmonë e hapur për negociata dhe jemi duke punuar për detajet,” theksoi Malone, duke lënë të hapur mundësinë për garues të rinj në F1.
Një histori e pasur në Formula 1
Pista Spa-Francorchamps është një nga më ikoniket në historinë e Formula 1, duke qenë pjesë e kalendarit që nga sezoni i parë i kampionatit në vitin 1950. Ajo ka qenë e pandërprerë në kalendarin vjetor që nga viti 2007, duke ofruar disa nga garat më të paharrueshme në histori.
CEO i Formula 1, Stefano Domenicali, theksoi rëndësinë historike të garës belge:
“Grand Prix i Belgjikës është një nga garat që nisën konkurrencën e Formula 1 në vitin 1950. Këtë vit, në 75-vjetorin e kampionatit, do të takohemi në Belgjikë më 27 korrik.”
Sezoni i ri i Formula 1 do të nisë më 16 mars në Melburn, duke premtuar një tjetër vit spektakolar për adhuruesit e këtij sporti.
