Futbollisti gjerman Thomas Müller ka njoftuar se do të largohet nga Bayerni i Mynihut në fund të këtij sezoni, pas 25 vjetësh qëndrimi në klub. Müller, një nga emrat më të shquar në historinë e Bayernit, ka zbuluar se klubi nuk i ka ofruar një kontratë të re, duke bërë që ai të marrë vendimin për të lënë ekipin.
Müller, i cili ka luajtur 743 ndeshje për Bayernin, duke shënuar 247 gola dhe regjistruar 273 asistime, theksoi se dëshironte të vazhdonte karrierën e tij me ekipin ku kaloi pjesën më të madhe të jetës së tij profesionale. Megjithatë, ai shpjegoi se klubi ka vendosur të mos e rinovojë kontratën.
“Pas gjithë këtyre viteve, pavarësisht se sa luaj, më pëlqen të jem në fushë me djemtë dhe së bashku luftojmë për trofe. Mund ta imagjinoja veten në këtë rol edhe sezonin e ardhshëm. Bayern vendosi të mos negociojë një kontratë të re me mua. Edhe pse kjo nuk është në përputhje me dëshirat e mia, është e rëndësishme që klubi të ndjekë bindjet e tij,” shkroi Müller në rrjetin social Instagram.
Müller (35 vjeç) ka qenë një pjesë integrale e suksesit të Bayernit, duke fituar 33 trofe, përfshirë dy Liga të Kampionëve dhe 12 tituj të Bundesligës. Ai gjithashtu ka luajtur 131 ndeshje për kombëtaren gjermane, ku shënoi 45 gola dhe ishte pjesë e ekipit që fitoi Kupën e Botës në vitin 2014.
Për Bayernin, ky është një moment i dhimbshëm pasi legjenda e klubit, e cila iu bashkua akademisë së Bayernit në moshën 10-vjeçare në vitin 2000, do të largohet pas një periudhe të pashembullt. Klubi ka konfirmuar se Müller do të largohet në fund të sezonit dhe ka shprehur mirënjohjen për kontributin e tij të jashtëzakonshëm gjatë 25 viteve të kaluara.
“Klubi dhe Thomas Müller kanë vendosur t’i japin fund një bashkëpunimi unik prej 25 vitesh me 33 trofe këtë verë. Müller hyri në historinë e klubit, fitoi gjithçka që kishte për të fituar dhe u bë rekordi i klubit me gjithsej 743 ndeshje konkurruese,” thuhet në një deklaratë nga Bayern.
Këtë sezon, Müller luajti 36 ndeshje për Bayernin dhe shënoi pesë gola dhe pesë asistime.
