Donald Trump tha të enjten se votuesit hebre amerikanë do të ishin pjesërisht të përgjegjshëm nëse ai humbet zgjedhjet më 5 nëntor dhe aktualja nënkryetare, Kamala Harris, fiton.
Në një fjalim në Samitin Kombëtar të Këshillit Izraelito-Amerikan në Washington, ish-presidenti amerikan shprehu shqetësimin se po mbetej prapa Harris mes hebrenjve amerikanë. Ai parashikoi se Izraeli do të zhdukej brenda dy vitesh nëse Harris fiton zgjedhjet, dhe hebrenjtë do të ishin pjesërisht përgjegjës për këtë rezultat, sepse shpesh votojnë për demokratët. “Nëse nuk fitoj këto zgjedhje, hebrenjtë do të kenë shumë lidhje me këtë, sepse 40 për qind, mendoj, 60 për qind votojnë për armikun – Izraeli, sipas mendimit tim, do të zhduket brenda dy vitesh,” tha Trump para të pranishmëve.
Trump, kandidati republikan për president, referoi një anketë që tregon se Harris merr 60 për qind të votave mes hebrenjve amerikanë. Ai gjithashtu shprehu keqardhje që në zgjedhjet e 2016-s, kur ai fitoi, dhe në ato të 2020-s, kur fitoi presidenti demokrat Joe Biden, mori më pak se 30 për qind të votave nga hebrenjtë amerikanë.
Nuk është e qartë se për cilën anketë po flet ish-presidenti, por një anketë e fundit nga Pew Research tregon se hebrenjtë amerikanë preferojnë Kamala Harris ndaj Trumpit – 65 për qind ndaj 34 për qind.
Trump dha një deklaratë të ngjashme në një samit tjetër të mbajtur më herët të njëjtën natë në Washington, të dedikuar për luftën kundër antisemitizmit në Amerikë. Ai e ka bërë përparësi në fushatën e tij për të fituar votuesit hebre në shtetet kyçe për fitoren.
Hebrenjtë amerikanë kanë qenë më shumë pro demokratëve në zgjedhjet federale për dekada, dhe kjo nuk ka ndryshuar deri tani; një ndryshim i vogël në votimin e tyre mund të përcaktojë fituesin në nëntor.
Në një shtet kyç që përcakton fituesin e zgjedhjeve – Pensilvani, jetojnë më shumë se 400,000 hebrenj. Aty, në vitin 2020, Biden fitoi me një avantazh prej 81,000 votash.
Udheheqesi i fushatës së Kamala Harris, Morgan Finkelstein, kritikoi Trumpin për lidhjet e tij me antisemitët para fjalimit të tij. Trump e hodhi poshtë çdo akuzë për antisemitizëm, duke theksuar në fjalimin e tij të enjten se dhëndri i tij është hebre.
Megjithatë, ai nuk reagoi ndaj një raporti të CNN-it të publikuar më herët gjatë ditës, që lidhej me një deklaratë të kandidatit republikan për guvernator të Karolinës së Veriut, Mark Robinson, i cili duket se njëherë e quajti veten “nacist të zi!” në komentet e tij të publikuara në një faqe pornografike dhe shprehte mbështetje për rikthimin e skllavërisë.
