Manchester United nuk ka arritur të fitojë përsëri në Premier League, duke barazuar 1:1 si mysafirë në ndeshjen e raundit të 34-të kundër Bournemouth. Ky është barazimi i pestë radhazi për skuadrën nga “Old Trafford”, e cila vazhdon të ketë një formë të dobët në nivelin më të lartë të futbollit anglez.
Në këtë ndeshje, skuadra e Ruben Amorim thuajse pësoi një humbje tjetër, por sulmuesi Rasmus Hoylund shpëtoi “Djajtë e Kuq” me një gol në minutat e kohës shtesë. Bournemouth kaloi në avantazh që nga minuta e 23-të, kur Antoine Semenyo shënoi pas një asistimi nga Evanilson.
United u mundua vazhdimisht të barazonte rezultatin, dhe shpresat e tyre u rritën më tej kur Bournemouth mbeti me dhjetë lojtarë që nga minuta e 68-të, pasi braziliani Evanilson mori kartonin e kuq për një faull të ashpër ndaj Nusair Mazraui.
Kur dukej se Bournemouth do të merrte të tri pikët, Hoylund hyri në skenë dhe arriti të shënojë në minutën e fundit të ndeshjes. Luke Shaw krosoi nga e majta dhe pas një devijimi të topit nga Manuel Ugarte, sulmuesi danez ishte në vendin e duhur për të mposhtur portierin Kepa Arrizabalaga.
Pas këtij barazimi, Bournemouth mbetet në vendin e 10-të në tabelë me 50 pikë, ndërsa Manchester United ndodhet në pozitat e 14-të me 39 pikë.
Nuk ka dyshim se fokusimi i United tashmë është larg Premier League, pasi ata përballen me ndeshjen e parë të gjysmëfinales së Europa League kundër Athletic Bilbaos të mërkurën.
