Presidentja e Komisionit Evropian, Ursula von der Leyen, ka deklaruar se politikat e ish-presidentit amerikan, Donald Trump, po sjellin “ndryshime historike” që po e detyrojnë Bashkimin Evropian të angazhohet më fuqishëm në skenën globale.
Në një intervistë për gazetën gjermane Die Zeit, Von der Leyen tha se “Perëndimi, ashtu siç e kemi njohur deri tani, nuk ekziston më”, duke nënvizuar se krizat aktuale mes administratës amerikane dhe Evropës, të kombinuara me sfidat globale, kërkojnë reagim të vendosur nga BE-ja.
Edhe pse ajo është shprehur se ka qenë gjithmonë “atlantiste e bindur” dhe “mike e madhe e SHBA-së”, presidentja evropiane theksoi se rendi botëror tradicional është duke u shndërruar në një “kaos global”. Sipas saj, ky kaos është nxitur nga garat për dominim mes SHBA-së dhe Kinës, si dhe nga ambiciet imperialiste të presidentit rus Vladimir Putin.
“Për këtë arsye, kemi nevojë për një Bashkim Evropian të ri, të ndryshuar, të gatshëm për të dalë në skenën globale dhe për të marrë pjesë aktive në formësimin e rendit të ri botëror që po vjen”, përfundoi Von der Leyen.
