Një kompani izraelite e teknologjisë, e njohur për zhvillimin e softuerëve të avancuar për hakimin e pajisjeve, dyshohet se ka spiunuar 90 përdorues të aplikacionit të njohur WhatsApp, në pronësi të kompanisë Meta. Sipas raportimeve të mediave të huaja, Paragon Solutions ka përgjuar individë në më shumë se 20 vende, përfshirë Evropën.
Kush qëndron pas sulmit?
Sipas gazetës britanike The Guardian, ende mbetet e paqartë se kush e ka urdhëruar këtë operacion, pasi softueri i Paragon Solutions përdoret nga qeveri të ndryshme në mbarë botën. WhatsApp ka pranuar se nuk ka arritur të identifikojë palët që qëndrojnë pas sulmeve të dyshuara.
Një punonjës i WhatsApp i tha agjencisë Reuters se sulmet janë kryer në më shumë se 20 vende, ndërsa në shënjestër kanë qenë gazetarë dhe figura të tjera të rëndësishme. WhatsApp ka nisur të njoftojë përdoruesit e prekur dhe u ka sugjeruar atyre që të kërkojnë ndihmë nga Citizen Lab, një organizatë kanadeze e specializuar në monitorimin e sigurisë kibernetike.
Një sulm i sofistikuar dhe i padukshëm
Sipas zyrtarëve të WhatsApp, përdoruesve u janë dërguar dokumente elektronike me qëllim të keq, të cilat nuk kërkonin ndonjë ndërveprim nga ana e tyre. Kjo do të thotë se objektivat nuk ishin të detyruar të hapnin ndonjë lidhje apo skedar për të rënë pre e sulmit, një metodë e avancuar e spiunazhit kibernetik.
Burimi i Reuters nuk pranoi të zbulojë mënyrën se si WhatsApp arriti të identifikojë Paragon Solutions si përgjegjëse për këtë sulm, por bëri të ditur se organet e rendit dhe partnerët e industrisë janë njoftuar për incidentin.
WhatsApp ka dorëzuar një ankesë zyrtare ndaj Paragon dhe ka kërkuar ndërprerjen e menjëhershme të ndërhyrjeve. Kompania theksoi se sulmet ishin ndaluar në dhjetor, por ende mbetet e paqartë se për sa kohë përdoruesit kanë qenë të komprometuar.
Nga ana tjetër, Paragon Solutions ka refuzuar të komentojë mbi akuzat e ngritura nga Reuters dhe The Guardian, duke mos dhënë asnjë përgjigje lidhur me përfshirjen e saj në këtë operacion të dyshuar të spiunazhit.
